ಧಾರವಾಡಕ್ಕೆ ಪ್ರತ್ಯೇಕ ಪಾಲಿಕೆ ಅಗತ್ಯ- ಮುಖ್ಯಮಂತ್ರಿಗೆ ಪತ್ರ ಬರೆದ ಮಾಜಿ ಸಚಿವ ಎಚ್ ಕೆ. ಪಾಟೀಲ

Spread the love

ಹುಬ್ಬಳ್ಳಿ: ಧಾರವಾಡನ್ನು ಮೊದಲಿನಿಂದಲೂ ಅಭಿವೃದ್ಧಿಯ ವಿಷಯದಲ್ಲಿ ಕಡೆಗಣಿಸಲಾಗುತ್ತಿದ್ದು ಆದ್ದರಿಂದ ಕೂಡಲೇ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ಈ ವಿಷಯವನ್ನು ಗಂಭೀರವಾಗಿ ಪರಿಗಣಿಸಬೇಕು ಮತ್ತು ಸರ್ವಾಂಗೀಣ ಅಭಿವೃದ್ಧಿಗೆ ಧಾರವಾಡಕ್ಕೆ ಪ್ರತ್ಯೇಕ ಮಹಾನಗರ ಪಾಲಿಕೆ ರಚಿಸಬೇಕು ಎಂದು ಗದಗ ವಿಧಾನ ಸಭಾ ಕ್ಷೇತ್ರದ ಶಾಸಕರು ಹಾಗೂ ಮಾಜಿ ಸಚಿವರಾದ ಎಚ್‌.ಕೆ. ಪಾಟೀಲ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರಿಗೆ ಪತ್ರಬರೆದು ಆಗ್ರಹಿಸಿದ್ದಾರೆ.
ಹುಬ್ಬಳ್ಳಿ–ಧಾರವಾಡ ಮಹಾನಗರ ಪಾಲಿಕೆ ರಚನೆಯಾಗಿ ಆರು ದಶಕಗಳಾಗಿವೆ. ಈ ಅವಧಿಯಲ್ಲಿ ಅವಳಿ ನಗರಗಳು ಸಾಕಷ್ಟು ಬೆಳೆದಿದ್ದು, ಜನಸಂಖ್ಯೆಯೂ ಹೆಚ್ಚಾಗಿದೆ. ಧಾರವಾಡ ವಿವಿಧ ತರಬೇತಿಗಳ ವಿದ್ಯಾಕೇಂದ್ರವಾಗಿದೆ. ಎರಡೂ ನಗರಗಳಿಗೆ ಸಮರ್ಪಕವಾಗಿ ನಾಗರಿಕ ಸೌಲಭ್ಯಗಳನ್ನು ಒದಗಿಸಲು ಕಷ್ಟಸಾಧ್ಯವಾಗುತ್ತಿದೆ. ಆದ್ದರಿಂದ ಧಾರವಾಡ ಪ್ರತ್ಯೇಕ ಪಾಲಿಕೆ ರಚನೆ ಅನಿವಾರ್ಯ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಹುಬ್ಬಳ್ಳಿ–ಧಾರವಾಡ ಪಾಲಿಕೆ ಜನಸಂಖ್ಯೆ ಹಾಗೂ ವಿಸ್ತಾರದಲ್ಲಿ ದೊಡ್ಡದಿದ್ದರೂ ಬೇರೆ ಪಾಲಿಕೆಗಳಿಗೆ ಸಿಕ್ಕಷ್ಟೇ ಅನುದಾನ ಸಿಗುತ್ತಿದೆ. ಪ್ರತ್ಯೇಕ ಪಾಲಿಕೆಯಾದರೆ ಬೇರೆ ಅನುದಾನ ಲಭಿಸಿ ನಗರಗಳ ಅಭಿವೃದ್ಧಿಗೆ ಅನುಕೂಲವಾಗುತ್ತದೆ. ಈಗಿನ ಮಹಾನಗರ ಪಾಲಿಕೆಗೆ ಸಿಗುತ್ತಿರುವ ಅನುದಾನದಲ್ಲಿ ಶೇ 15ರಿಂದ 20ರಷ್ಟು ಮಾತ್ರ ಧಾರವಾಡಕ್ಕೆ ಲಭಿಸುತ್ತಿದೆ ಎಂದಿದ್ದಾರೆ.
1976ರ ಕರ್ನಾಟಕ ಮುನ್ಸಿಪಲ್‌ ಕಾರ್ಪೊರೇಷನ್‌ ಕಾಯ್ದೆ ಪ್ರಕಾರ ಪ್ರತ್ಯೇಕ ಪಾಲಿಕೆಗಳ ರಚನೆಗೆ ಇರಬೇಕಾದ ಎಲ್ಲಾ ಅರ್ಹತೆಗಳು ಧಾರವಾಡಕ್ಕೆ ಇವೆ. ರಾಜ್ಯದ ಇತರ ಪಾಲಿಕೆಗಳು ಹಾಗೂ ಇಲ್ಲಿನ ಪಾಲಿಕೆಗೆ ಲಭಿಸಿದ ಅನುದಾನದ ವಿವರ, ಜನಸಂಖ್ಯೆ, ವಿಸ್ತೀರ್ಣ ಹಾಗೂ ಕರ ಆದಾಯದ ಮಾಹಿತಿ ನೋಡಿದರೆ ಧಾರವಾಡಕ್ಕೆ ಅನ್ಯಾಯವಾಗಿರುವುದು ಗೊತ್ತಾಗುತ್ತದೆ. ಆದ್ದರಿಂದ ಪ್ರತ್ಯೇಕ ಪಾಲಿಕೆ ಮಾಡಬೇಕು ಎಂದು ಆಗ್ರಹಿಸಿದ್ದಾರೆ.
1962ರಲ್ಲಿ ಹುಬ್ಬಳ್ಳಿ–ಧಾರವಾಡ ಮಹಾನಗರ ಪಾಲಿಕೆ ಅಸ್ತಿತ್ವಕ್ಕೆ ಬಂತು. ಹುಬ್ಬಳ್ಳಿಯನ್ನು ಮಾತ್ರವೇ ಪಾಲಿಕೆ ಮಾಡುವ ಯೋಜನೆ ಇತ್ತಾದರೂ ಪಾಲಿಕೆ ರಚನೆಗೆ ಅಗತ್ಯ ಇರುವಷ್ಟು ಜನಸಂಖ್ಯೆ ಇಲ್ಲದ ಕಾರಣ ಜಿಲ್ಲಾ ಕೇಂದ್ರವಾದ ಧಾರವಾಡವನ್ನು ಸೇರಿಸಿಕೊಳ್ಳಲಾಯಿತು. ಆಗ ಅವಳಿ ನಗರದ ಒಟ್ಟು ಜನಸಂಖ್ಯೆ 3.80 ಲಕ್ಷ ಇತ್ತು. ಆದರೆ 2011ರ ಜನಗಣತಿಯಂತೆ ಅವಳಿ ನಗರದ ಜನಸಂಖ್ಯೆ 11.50ಲಕ್ಷ.
ನಗರೀಕರಣ, ನಗರಗಳತ್ತ ಜನರ ವಲಸೆ ಹಾಗೂ ಕೈಗಾರಿಕೆಗಳ ಸ್ಥಾಪನೆಯಿಂದಾಗಿ ಈಗ ಅವಳಿ ನಗರದ ಜನಸಂಖ್ಯೆ 16 ಲಕ್ಷ ದಾಟಿದೆ ಎಂದು ಅಂದಾಜು ಮಾಡಲಾಗಿದೆ. ಎರಡೂ ನಗರಗಳು ಒಟ್ಟು 244 ಚದರ ಕಿಲೋ ಮೀಟರ್ ವ್ಯಾಪ್ತಿಗೆ ವಿಸ್ತರಿಸಿಕೊಂಡಿವೆ. ಪಾಲಿಕೆಯ ವಾರ್ಡ್‌ಗಳ ಸಂಖ್ಯೆಯೂ ಕಳೆದ ಚುನಾವಣೆ ಸಂದರ್ಭದಲ್ಲಿ 82ಕ್ಕೆ ಏರಿಕೆಯಾಗಿದೆ. (2021ರ ಸೆ. 3ರಂದು ಚುನಾವಣೆ ನಡೆದಿತ್ತು. ಆದರೆ ಇಂದಿಗೂ ಚುನಾಯಿತರಿಗೆ ಅಧಿಕಾರ ಸಿಕ್ಕಿಲ್ಲ. ಮೇಯರ್, ಉಪಮೇಯರ್ ಆಯ್ಕೆಯೂ ಆಗಿಲ್ಲ). ಹೀಗಿದ್ದರೂ ರಾಜ್ಯದಲ್ಲಿರುವ ಇತರ ಹತ್ತು ಚಿಕ್ಕ ಮಹಾನಗರ ಪಾಲಿಕೆಗಳಿಗೆ ಸಿಗುವಷ್ಟೇ ಅನುದಾನ ಈ ಅವಳಿ ನಗರಕ್ಕೂ ಸಿಗುತ್ತಿರುವುದು ಬಕಾಸುರನ ಹೊಟ್ಟೆಗೆ ಅರೆಕಾಸಿನ ಮಜ್ಜಿಗೆ ಎಂಬಂತಾಗಿದೆ.
ನಗರೀಕರಣದಿಂದಾಗಿ ಎರಡೂ ನಗರಗಳಲ್ಲಿ ಅನೇಕ ವಸತಿ ಬಡಾವಣೆಗಳು ಅಸ್ತಿತ್ವಕ್ಕೆ ಬಂದಿವೆ. ಅದರಲ್ಲೂ ಧಾರವಾಡದಲ್ಲಿ ಅನೇಕ ಶಿಕ್ಷಣ ಸಂಸ್ಥೆಗಳು, ವಿಶ್ವವಿದ್ಯಾಲಯ, ಐಐಟಿ ಹಾಗೂ ಐಐಐಟಿಯಂತಹ ಉನ್ನತ ಶಿಕ್ಷಣ ಸಂಸ್ಥೆಗಳು, ಹೈಕೋರ್ಟ್‌, ಆಸ್ಪತ್ರೆಗಳು, ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತರಬೇತಿ ನೀಡುವ ಕೇಂದ್ರಗಳು, ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳ ಕಚೇರಿಗಳು ಸ್ಥಾಪನೆಗೊಂಡ ಪರಿಣಾಮ ಜನವಸತಿ, ಸಂಚಾರ ಎಲ್ಲವೂ ಹೆಚ್ಚಿದೆ.
ಪಾಲಿಕೆಗಳಿಗೆ ಸಿಗುತ್ತಿರುವ ಪ್ರಮುಖ ಅನುದಾನಗಳು ಹೀಗಿವೆ: ಮೂರು ವರ್ಷ ನೀಡುವ ಮುಖ್ಯಮಂತ್ರಿಗಳ ಅನುದಾನ ₹100 ಕೋಟಿ, ಮಹಾತ್ಮಾ ಗಾಂಧಿ ನಗರ ವಿಕಾಸ ಯೋಜನೆಯಲ್ಲಿ ₹150 ಕೋಟಿ, ಸ್ಮಾರ್ಟ್ ಸಿಟಿ ಯೋಜನೆಯಲ್ಲಿ ಒಂದು ಅವಧಿಗೆ ₹1 ಸಾವಿರ ಕೋಟಿ, ಅಮೃತ ಯೋಜನೆಯಲ್ಲಿ ₹150ರಿಂದ ₹200 ಕೋಟಿ, ಕೇಂದ್ರ ಹಣಕಾಸು ಯೋಜನೆಯಲ್ಲಿ ₹50 ಕೋಟಿ, ರಾಜ್ಯ ಹಣಕಾಸು ಯೋಜನೆಯಲ್ಲಿ ವಾರ್ಷಿಕ ₹10 ಕೋಟಿ.
*ಪ್ರತ್ಯೇಕ ಕೂಗು ಏಕೆ*
ಉತ್ತರ ಕರ್ನಾಟಕದ ವಾಣಿಜ್ಯ ಕೇಂದ್ರ ಹುಬ್ಬಳ್ಳಿ ಹಾಗೂ ಶಿಕ್ಷಣ ಕಾಶಿ ಧಾರವಾಡ ಸುಮಾರು 50 ವರ್ಷಗಳಿಂದ ಅವಳಿ ನಗರಗಳಾಗಿಯೇ ಗುರುತಿಸಿಕೊಂಡಿವೆ. ಆದರೆ ಈ ಅರ್ಧ ಶತಮಾನದಲ್ಲಿ ಎರಡೂ ನಿರೀಕ್ಷೆಯಂತೆ ಬೆಳವಣಿಗೆ ಕಂಡಿಲ್ಲ. ಕೆಲವೇ ವರ್ಷಗಳ ಹಿಂದೆ ಅಸ್ತಿತ್ವಕ್ಕೆ ಬಂದ ಕೆಲವು ಮಹಾನಗರ ಪಾಲಿಕೆಗಳ ಜನಸಂಖ್ಯೆಗಿಂತ ನಾಲ್ಕು ಪಟ್ಟು ಜನಸಂಖ್ಯೆ ಹುಬ್ಬಳ್ಳಿ ಧಾರವಾಡದಲ್ಲಿ ಇದೆ. ಹೀಗಿದ್ದರೂ ಧಾರವಾಡ ಈಗಲೂ ಒಂದು ‘ಸುಧಾರಿಸಿದ ಹಳ್ಳಿ’ ಎಂದೇ ಕರೆಯಿಸಿಕೊಳ್ಳುತ್ತಿದೆ.
ಈ ಅವಳಿ ನಗರಗಳಿಗೆ ಸರ್ಕಾರ ನೀಡುತ್ತಿರುವ ಅನುದಾನ ಏತಕ್ಕೂ ಸಾಲುತ್ತಿಲ್ಲ. ಹುಬ್ಬಳ್ಳಿ–ಧಾರವಾಡ ಮಹಾನಗರ ಪಾಲಿಕೆಯ ಆಡಳಿತ ಯಂತ್ರ ನಿಭಾಯಿಸುವುದಕ್ಕೇ ದೊಡ್ಡ ಮೊತ್ತ ಖರ್ಚಾಗುತ್ತಿದೆ. ಅನುದಾನದ ಸಿಂಹ ಪಾಲು ಹುಬ್ಬಳ್ಳಿಗೆ ಮಾತ್ರ ವೆಚ್ಚವಾಗುತ್ತಿದೆ ಎಂಬುದು ಧಾರವಾಡದ ಜನರಲ್ಲಿ ಅತೃಪ್ತಿ ಮೂಡಿಸಿದೆ.
*ಧಾರವಾಡ ಕಡೆಗಣನೆ*
ಒಂದು ಅವಧಿಗೆ ನೀಡಲಾದ ಸ್ಮಾರ್ಟ್ ಸಿಟಿ ಅನುದಾನದಲ್ಲಿ ಧಾರವಾಡಕ್ಕೆ ಒಂದು ಯೋಜನೆಯನ್ನೂ ಮಂಜೂರು ಮಾಡದಿರುವುದು ಧಾರವಾಡದ ಜನರ ಅಸಮಾಧಾನಕ್ಕೆ ಕಾರಣವಾಗಿದೆ. ಇಷ್ಟು ಮಾತ್ರವಲ್ಲ, 2018ರ ವಿಧಾನಸಭಾ ಚುನಾವಣೆ ಹೊಸ್ತಿಲಲ್ಲಿ ಅವಳಿ ನಗರಕ್ಕೆ ಮೂರು ಟೆಂಡರ್ ಶೂರ್ ರಸ್ತೆ ಮಂಜೂರಾಗಿತ್ತು. ಅದರಲ್ಲಿ ಒಂದು ಧಾರವಾಡಕ್ಕೆ ಮೀಸಲಾಗಿತ್ತು. ಹುಬ್ಬಳ್ಳಿಯ ರಸ್ತೆಗಳ ಕಾಮಗಾರಿ ಪೂರ್ಣಗೊಂಡು ಸಂಚಾರಕ್ಕೆ ಮುಕ್ತವಾದವು. ಆದರೆ ಧಾರವಾಡ ಟೆಂಡರ್ ಶೂರ್ ರಸ್ತೆ ಇಂದಿಗೂ ಸರಿಯಾಗಿ ಪೂರ್ಣಗೊಂಡಿಲ್ಲ. ಅಭಿವೃದ್ಧಿ ವಿಷಯದಲ್ಲಿ
ಧಾರವಾಡದ ಬಗ್ಗೆ ಮಲತಾಯಿ ಧೋರಣೆ ತಳೆಯಲಾಗಿದೆ ಎಂಬ ಭಾವನೆ ಹೆಚ್ಚಾಗಲು ಕಾರಣವಾಗಿವೆ.
ಪಾಲಿಕೆ ಆಯುಕ್ತರು ವಾರದಲ್ಲಿ ಎರಡು ದಿನ (ಮಂಗಳವಾರ, ಶುಕ್ರವಾರ) ಧಾರವಾಡ ಕಚೇರಿಯಲ್ಲಿ ಲಭ್ಯವಿರಬೇಕು ಎಂಬ ನಿರ್ಣಯವನ್ನು ಧಾರವಾಡದ ಸದಸ್ಯರ ಆಗ್ರಹದ ಮೇಲೆ ಸಾಮಾನ್ಯ ಸಭೆಯಲ್ಲಿ ತೆಗೆದುಕೊಳ್ಳಲಾಗಿತ್ತು. ಹೀಗಿದ್ದರೂ ಈ ಎರಡು ದಿನಗಳಲ್ಲಿ ಧಾರವಾಡ ಜನರಿಗೆ ಆಯುಕ್ತರ ಲಭ್ಯತೆ ವಿರಳಾತಿವಿರಳ. ಆಯುಕ್ತರು ಕೈಗೆ ಸಿಗುವುದಿಲ್ಲ ಎನ್ನುತ್ತಾರೆ ಹಿರಿಯ ಮುಖಂಡ ಪಿ.ಎಚ್.ನಿರಲಕೇರಿ.


Spread the love

Leave a Reply

error: Content is protected !!