ಅಕ್ಷಯ ತೃತೀಯ ಎಂದರೆ ಏನು? ಅದರ ಮಹತ್ವ

ಹಿಂದೂ ಪುರಾಣಗಳ ಪ್ರಕಾರ, ತ್ರೇತಾಯುಗವು ಅಕ್ಷಯ ತೃತೀಯ ದಿನದಂದು ಪ್ರಾರಂಭವಾಯಿತು. ಅಕ್ಷಯ ತೃತೀಯದಂದು ಚಿನ್ನವನ್ನು ಖರೀದಿಸುವುದರಿಂದ ಭವಿಷ್ಯದಲ್ಲಿ ಅದು ಅಕ್ಷಯವಾಗುತ್ತದೆ ಅರ್ಥಾತ್ ಸಮೃದ್ಧವಾಗುತ್ತದೆ ಎಂಬ ನಂಬಿಕೆ ಇದೆ. ಈ ಕಾರಣದಿಂದ ಜನರು ಈ ದಿನದಂದು ಚಿನ್ನದ ಆಭರಣಗಳನ್ನು ಖರೀದಿಸಲು ಬಯಸುತ್ತಾರೆ. ಅಕ್ಷಯ ತೃತೀಯ ದಿನದಂದು ದಾನ, ಯಜ್ಞದಂತಹ ಶುಭ ಕಾರ್ಯಗಳನ್ನು ಮಾಡುವ ವ್ಯಕ್ತಿಯು ಜೀವನದಲ್ಲಿ ಒಳ್ಳೆಯ ಫಲಿತಾಂಶಗಳನ್ನು ಪಡೆಯುತ್ತಾನೆ ಮತ್ತು ಅಂತಹವರು ಲಕ್ಷ್ಮಿ ದೇವಿಯು ಕೃಪೆಗೆ ಪಾತ್ರರಾಗುತ್ತಾರೆ ಎಂದೂ ನಂಬಲಾಗಿದೆ.
*ಹಬ್ಬವನ್ನು ಆಚರಿಸುವುದು ಹೇಗೆ?*
ಅಕ್ಷಯ ತೃತೀಯದ ಮಂಗಳಕರ ದಿನದಂದು ಜನರು ಉಪವಾಸ ಮಾಡುತ್ತಾರೆ. ಭಗವಾನ್ ವಿಷ್ಣುವಿಗೆ ಪ್ರಾರ್ಥನೆ ಸಲ್ಲಿಸಿ, ಮಂತ್ರಗಳನ್ನು ಪಠಿಸುತ್ತಾರೆ. ಇದಲ್ಲದೆ, ಭಕ್ತರು ವಿಷ್ಣು, ಗಣೇಶ ಸೇರಿದಂತೆ ಮನೆದೇವತೆಗಳಿಗೆ ನೈವೇದ್ಯವನ್ನು ತಯಾರಿಸಿ ಪೂಜಿಸುತ್ತಾರೆ. ಈ ದಿನ ಹಲವು ವಿಶೇಷ ಕಾರ್ಯಕ್ರಮಗಳನ್ನೂ ಕೈಗೊಳ್ಳಲಾಗುತ್ತದೆ.
*ಈ ವಸ್ತುಗಳನ್ನು ದಾನ ಮಾಡಿ*
ಶ್ರೀಗಂಧ: ವಿಶೇಷವಾದ ಅಕ್ಷಯ ತೃತೀಯ ದಿನದಂದು ಶ್ರೀಗಂಧವನ್ನು ಬಡವರಿಗೆ ದಾನ ಮಾಡಿದರೆ ಅಪಘಾತದಂತಹ ಅಪಾಯ ಅಥವಾ ಅನಾವಶ್ಯಕ ಭಯಗಳಿಂದ ಪಾರಾಗಬಹುದು.
ತೆಂಗಿನಕಾಯಿ:ಶ್ರೀಫಲವೆಂದು ಕರೆಯಲ್ಪಡುವ ತೆಂಗಿನಕಾಯಿಗೆ ನಮ್ಮಲ್ಲಿ ವಿಶೇಷವಾದ ಸ್ಥಾನವಿದೆ.ಪೂಜೆ ಹವನಾದಿಗಳಲ್ಲಿ ತೆಂಗಿನಕಾಯಿಯನ್ನು ಪೂಜಿಸುವ ಶಾಸ್ತ್ರವೂ ಇದೆ ಹೀಗಿರುವಾಗ ಈ ಶುಭದಿನದಂದು ನೀವು ತೆಂಗಿನಕಾಯಿ ಯನ್ನು ಬ್ರಾಹ್ಮಣರಿಗೆ ನೀಡಿದರೆ ನಿಮ್ಮ ಪೂರ್ವಜರು ಹಿಂದಿನ ಜನ್ಮದಲ್ಲಿ ಮಾಡಿದ ಪಾಪಗಳಿಂದ ಮುಕ್ತರಾಗುತ್ತಾರೆ.
ಮಜ್ಜಿಗೆ: ಮಜ್ಜಿಗೆಯು ಅಮೃತಕ್ಕೆ ಸಮವಾದುದು. ಹಾಗಾಗಿ ಅಕ್ಷಯ ತೃತೀಯದಂದು ಈ ಮಜ್ಜಿಗೆಯನ್ನು ಬ್ರಾಹ್ಮಣರಿಗೆ ನೀಡಿದರೆ ನಿಮಗೆ ಶಿಕ್ಷಣಕ್ಕೆ ಸಂಬಂಧಿಸಿದಂತೆ ಒಳಿತಾಗುತ್ತದೆ.
ವೀಳ್ಯದೆಲೆ: ವೀಳ್ಯದೆಲೆಗೆ ಹಿಂದೂ ಸಂಪ್ರದಾಯದಲ್ಲಿ ಪವಿತ್ರವಾದ ಸ್ಥಾನವಿದೆ.ಹಾಗಾಗಿ ಈ ದಿನದಂದು ವೀಳ್ಯವನ್ನು ನೀರಿನೊಂದಿಗೆ ಇಟ್ಟು ಬ್ರಾಹ್ಮಣರಿಗೆ ನೀಡಿದರೆ ನಿಮ್ಮ ವ್ಯಕ್ತಿತ್ವದ ಸರ್ವತೋಮುಖ ಬೆಳವಣಿಗೆ ಯಾಗುತ್ತದೆ.
ಉದಕುಂಭ ದಾನ: ಅಕ್ಷಯ ತೃತೀಯದಂದು ಕಂಚು ಅಥವಾ ಬೆಳ್ಳಿ ಯ ಬಟ್ಟಲಿನಲ್ಲಿ ನೀರು ತುಂಬಿ‌ ಅದಕ್ಕೆ ಕೇಸರಿ, ಕರ್ಪೂರ ಹಾಗೂ ತುಳಸಿಯನ್ನಿಟ್ಟರೆ ಪಿತೃ ದೋಷವಿದ್ದಲ್ಲಿ ನಿವಾರಣೆಯಾಗುತ್ತದೆ.
ಅಲ್ಲದೇ ಸಂತಾನ ಭಾಗ್ಯವಿಲ್ಲದೇ ಕೊರಗುವವರಿಗೆ ಸಂತಾನ ಪ್ರಾಪ್ತಿಯೂ ಆಗುತ್ತದೆ.
ಮುತೈದೆಯರಿಗೆ ತಾಂಬೂಲದ ಅರಿಶಿಣ ಕುಂಕುಮ ಹೂವು ಗಂದಾಕ್ಷತೆ ಕೊಟ್ಟರೆ ಸೌಭಾಗ್ಯ ವೃದ್ಧಿ ಯಾಗುತ್ತದೆ.