ಡಾ. ಶ್ರೀನಿವಾಸ ಜೋಶಿಗೆ ರೆಟ್-ಬಕ್ಲರ್ ಪ್ರಶಸ್ತಿ ಗರಿ

ಹುಬ್ಬಳ್ಳಿ: ಅತ್ಯುತ್ತಮ ಶಸ್ತ್ರ ಚಿಕಿತ್ಸಾ ವಿಡಿಯೋಗಾಗಿ ನಗರದ ಎಂ.ಎಂ. ಜೋಶಿ ನೇತ್ರವಿಜ್ಞಾನ ಸಂಸ್ಥೆಯ ನಿರ್ದೇಶಕ ಡಾ.ಶ್ರೀನಿವಾಸ ಜೋಶಿ ಅವರಿಗೆ ಸತತ 7ನೇ ಬಾರಿ ರೆಟ್-ಬಕ್ಲರ್ ಪ್ರಶಸ್ತಿ ಲಭಿಸಿದೆ.
ಅಮೆರಿಕದ ಸಿಯಾಟಲ್ ನಗರದಲ್ಲಿ ಆ. 1ರಂದು ಆಯೋಜಿಸಿದ್ದ ಎಎಸ್​ಆರ್​ಎಸ್​ನ ವಾರ್ಷಿಕ ಸಮ್ಮೇಳನದಲ್ಲಿ ಪ್ರಶಸ್ತಿ ಪ್ರದಾನ ಮಾಡಲಾಯಿತು.
ರೆಟಿನಾ ಶಸ್ತ್ರಚಿಕಿತ್ಸಕರನ್ನು ಒಳಗೊಂಡಿರುವ ಅಮೆರಿಕನ್ ಸೊಸೈಟಿ ಆಫ್ ರೆಟಿನಲ್ ಸ್ಪೆಷಲಿಸ್ಟ್ (ಎಎಸ್​ಆರ್​ಎಸ್) ಜಾಗತಿಕವಾಗಿ ಗುರುತಿಸಲ್ಪಟ್ಟಿರುವ ಸಂಸ್ಥೆ. ಎಎಸ್​ಆರ್​ಎಸ್ ಸಮ್ಮೇಳನವು ಸಂಕೀರ್ಣವಾದ ವಿಟ್ರಿಯೋ ರೆಟಿನಲ್ ಶಸ್ತ್ರಚಿಕಿತ್ಸೆಗಳಲ್ಲಿ ಆದ ಇತ್ತೀಚಿನ ಪ್ರಗತಿಗಳ ಕುರಿತ ಪ್ರದರ್ಶನಕ್ಕೆ ವೇದಿಕೆಯಾಗಿ ಕಾರ್ಯನಿರ್ವಹಿಸುತ್ತದೆ. ಈ ವಿಷಯದಲ್ಲಿ ಪರಿಣತರಾದ ಡಾ. ಶ್ರೀನಿವಾಸ ಜೋಶಿ ಅವರಿಗೆ ಮತ್ತೊಮ್ಮೆ ರೆಟ್-ಬಕ್ಲರ್ ಪ್ರಶಸ್ತಿ ನೀಡಿ ಗೌರವಿಸಲಾಗಿದೆ.
ಪ್ರಶಸ್ತಿ ಸ್ವೀಕರಿಸಿದ ಡಾ. ಜೋಶಿ ಅವರು, ಸತತ ಏಳನೇ ಬಾರಿ ನನಗೆ ಈ ಪ್ರಶಸ್ತಿ ಒಲಿದಿರುವುದಕ್ಕೆ ಸಂತಸವಾಗಿದೆ. ಸಹ ಲೇಖಕ ಡಾ. ಗಿರಿರಾಜ್ ವಿಭೂತೆ, ಮಾರ್ಗದರ್ಶಕ ಡಾ.ಎ.ಎಸ್. ಗುರುಪ್ರಸಾದ್ (2016ರಲ್ಲಿ ರೆಟ್-ಬಕ್ಲರ್ ಪ್ರಶಸ್ತಿ ಪುರಸ್ಕೃತರು) ಅವರಿಗೂ ಧನ್ಯವಾದ ಸಲ್ಲಿಸಿದ್ದಾರೆ.